O Celta iluminará Balaídos para celebrar a lenda de Iago Aspas | OneFootball

O celtismo comezou esta tempada cun momento que pasará á historia. Iago Aspas, símbolo e alma do RC Celta, alcanzou un novo fito: converteuse no xogador con máis encontros oficiais disputados co club celeste. No duelo ante o Atlético de Madrid, celebrado en Abanca Balaídos, o de Moaña igualou as 533 participacións que durante máis de corenta anos ostentou o lendario Manolo, coñecido como “o Gran Capitán”.

Desde o seu debut en 2008, Aspas escribiu unha historia única, feita de goles decisivos, remontadas imposibles e emocións compartidas cunha afección que o sente como un dos seus. Non se trata só de cifras —aínda que as súas impresionan—, senón dun compromiso inquebrantable e dun amor sincero por unhas cores que o viron nacer e medrar. Iago non leva o escudo no peito: leva o Celta na alma.

O club quere renderlle a homenaxe que merece e, por iso, o vindeiro xoves 23 de outubro, ao rematar o encontro fronte ao OGC Nice, Balaídos vestirase de gala. A partir das 23:00 horas, o estadio iluminará o ceo cun espectáculo aéreo de drons que servirá de tributo á súa traxectoria. O acto prolongarase ata arredor das 23:20 h e promete ser unha noite de emoción, gratitude e orgullo compartido.

O Celta anima a toda a súa afección a participar nesta celebración, aplaudir ao seu capitán e ser testemuña dun momento histórico. Porque para quen sente estas cores, hai unha frase que resume todo: “Eu vin xogar a Iago Aspas”.

Se as condicións meteorolóxicas o impiden, a homenaxe trasladarase ao partido do domingo 9 de novembro fronte ao FC Barcelona.