O equipo con máis galegos na historia das competicións europeas | OneFootball

O Celta apostou nos últimos anos pola canteira, que está fundamentalmente formada por xogadores galegos, e iso levouno a bater varios rexistros nos últimos tempos, pero poucos como o que se viviu onte, e do que dá conta a Afouteza e Corazón en X: Foi o partido con máis galegos na historia das competicións europeas.

Ata o de onte o Celta disputara 82 partidos en calquera das competicións europeas que xogou ao longo da súa historia, e nunca alineara de inicio a seis xogadores galegos. Os elixidos por Giráldez foron Manu Fernández, Sergio Carreira, Miguel Román, Hugo Álvarez, Iago Aspas e Pablo Durán. Media ducia de xogadores nacidos en Galicia, catro deles na provincia de Pontevedra, máis o ourensán Hugo Álvarez e o ferrolán Manu Fernández.

Este foi ademais o partido no que calquera equipo xogou con máis xogadores galegos na historia das competicións europeas, desde a súa creación en 1955. Nunca ata o día de onte un equipo europeo presentara un once inicial no que máis da metade dos seus xogadores fosen galegos. Un orgullo para o Celta e a súa canteira, e tamén para o fútbol galego, que ademais tivo na segunda metade outros dous representantes máis na figura do compostelán Borja Iglesias e do vigués Hugo Sotelo. Ademais, os autores dos tantos foron galegos: Iago Aspas anotou o primeiro, e o segundo, aínda que foi en propia porta, levou o selo de Borja Iglesias, que executou o disparo que posteriormente rebotaría nun defensa para dar a vitoria aos célticos. A palabra orgullo queda curta.